六月新娘(105)_张爱玲

一〇五

　　第四十四场

　　景：酒家连街道

　　时：日

　　人：张、路人

　　D.I.

　　（张穿着大礼服匆匆走入南兴。）

　　C.O.

　　第四十五场

　　景：南兴酒家内

　　时：日

　　人：张、清、王、三号侍者、顾客

　　C.I.

　　（张穿礼服入南兴。熟客王先生向他招呼。）

　　王：咦！张老板今日做乜执得咁正呀？

　　张：唉！唔好提啦。（来王对面坐下）

　　王：系唔系庆祝胜利呀？

　　张：庆祝胜利？乜嘢胜利呀？

　　王：隔离嗰间北顺楼俾你打淋咗喇嘛！

　　张：乜嘢话？隔离……

　　王：你唔知咩？北顺楼唔够你做，而家揾人顶手呀！

　　张：真嘅！（一则以喜，一则以忧）

　　王：（拍张肩）啲外江佬唔够你斗嘅，一味充阔，有乜办法唔执笠呀，都系你好嘢。

　　张：北顺楼真系要执笠？

　　王：系，千真万确，乜你听见唔高兴咩？

　　张：我同北顺楼个李四宝而家已经成咗亲家啦。

　　王：啊？！

　　张：佢嘅女嫁俾我嘅仔做老婆，呢件嘢亲家上头，我要帮吓佢手至得嘅。喂！究竟点解会执笠？

　　王：对唔住噃，我唔知你地已经系两亲家。

　　张：唔紧要，呢件事我而家既然知道梗系要关心吓嘅！

　　王：我都唔系十分清楚。（又拍张背）怕乜嘢呀？惊你个亲家要嚟你度黐餐咩？

　　张：（苦笑）王先生成日讲笑。

　　（三号侍者送两个菜上来。）

　　三号：呢两个菜系送俾王先生食嘅，唔收钱。（张诧）

　　王：咦！做乜咁客气呀？

　　张：（忍痛）应该嘅，应该嘅，请便。（起，走开，附声间三号）喂！为乜事要送菜呀？

　　三号：系领班吴先生交带嘅。

　　张：小吴交带嘅？佢做乜嘢咁大方呀？

　　三号：今日佢对王先生系特别客气啲嘅。

　　张：点解呀，系唔系个王先生贴士俾得多？

　　三号：（摇头）唔系！（四顾低声）领班想拉呢位王先生做股东去顶咗间北顺楼落嚟。

　　张：乜话？佢想自己做老板？

　　三号：系！佢仲拉埋我地大师傅同佢合股添，预备顶咗落嚟开广东菜馆。

　　张：佢都开广东馆？

　　三号：系呀！

　　张：（恨恨地）好嘢！挖我嘅大师傅响我隔离开广东菜馆？！（突然故意地向三号）你点会知道？

　　三号：点会唔知啫？佢想拉埋我一齐做啦嘛。

　　张：（不屑地）佢拉你入股？

　　三号：系，全间南兴啲人佢个个都拉嚟。

　　张：咁你入咗股未呀？

　　三号：我边有钱入股呀？我一个月的人工，攞番去剩系食都未够呀！

　　张：唔好嘈，第二个月起加你五文一个月人工。

　　三号：加十文喇老板。

　　张：七文，唔好话俾人知。

　　（张匆匆打电话。）

　　Diss.

　　（清入，张迎上。）

　　清：爸爸揾我有乜嘢事呀？

　　张：我头先听到话你外父嗰间北顺楼要出顶！

　　清：（惊异）系？

　　张：佢地冇话俾你知呀？

　　清：冇，我想曼玲都会唔知，我剩系听闻话佢爸爸为咗办嫁妆，欠落一身债就有。

　　张：唉！咁佢又做乜咁阔佬仲要买层楼做嫁妆呀？

　　清：爸爸，我谂佢一定系冇钱又要顶硬上，夹硬将北顺楼让咗俾人，攞笔钱嚟买楼，你话系唔系嗱？

　　张：九成系啦，佢份人我都睇穿晒佢嘅啦。阿清，我地要想个办法嚟帮吓佢，无论如何唔俾佢间铺头执笠至得。

　　清：（感动）爸爸，我今日先至知你心地咁好嘅。

　　张：（有点不好意思，挥手）我一向都系咁嘅。

　　清：爸爸，唔啱我去叫佢唔好买楼啦。

　　张：冇用嘅，啲外江佬死要面子，你咁同佢话，佢未必肯。

　　清：唔啱我去话我地唔想同佢父母住开第二处，一定要住埋一齐，咁佢见风驶一定应承唔买楼嘅啦。

　　张：（大喜）呢个办法几好。

　　清：咁我而家即刻去。

　　（清匆匆出。）

　　C.O.

　　第四十六场

　　景：酒家连街道

　　时：日

　　人：清、吴、张、路人

　　C.I.

　　（清匆匆出南兴，远去。（片刻——（南兴门内忽然跑出小吴来，落荒而走，领班帽子落地也不及拾。（张由南兴追出，见吴已远去，回身入南兴。）

　　D.O.

太玄书阁(xuge.org)