六月新娘(100)_张爱玲

一〇〇

　　第二十七场

　　景：张家

　　时：夜

　　人：张、张太、佩、焕、女佣

　　D.I.

　　（张吃萝卜糕，张太太旁坐做针线。

　　（门铃响，女佣开门。佩入，迷迷糊糊地走向自己卧室——可尽量夸张。

　　（佩经过张及张太太身边竟如同未发觉身旁有人。

　　（张及张太太奇怪。）

　　张：阿佩，你做乜呀？

　　（佩继续前行。张来至佩身边叫。）

　　张：阿佩！

　　佩：（这才回身望父）唔！

　　张：你做乜咁样，唔系有乜嘢唔妥喇吗？

　　佩：唔系呀！

　　张：我叫你代表我去倾嗰啲嘢而家倾成点呀？

　　佩：倾妥晒咯！

　　张：我知道叫你啲刁蛮女仔出马梗倾唔掂嘅，佢地应承晒我地啲条件喇吗？

　　佩：应承！大家让步多少啦，写晒落嚟咯，我俾你睇吓。（开手袋取纸）

　　张：（一望钟）咦，够钟喇。（走向无线电）

　　佩：（取纸交张）爸爸你睇吓。

　　张：唔好嘈。（开收音机）

　　（佩无奈将纸放回手袋，至另一边沙发坐下。

　　（张边吃萝卜糕，边听曼的节目。）

　　O.S.曼：而家答复刘国庆君嘅问题。刘君，我好同情你，响而家呢个二十世纪嘅原子时代，竟然仲有咁顽固嘅父亲干涉仔女嘅婚姻，甚至于唔准你同女朋友通电话。我认为你父亲嘅呢种行为，不但野蛮，而且系十分愚蠢嘅……

　　张：咦！唔准同女朋友通电话？好似响处话我噃！

　　佩：边处系讲你呀，你自己多心啫。

　　O.S.曼：……至于你父亲，因为女家冇办法攞出一份丰厚嘅嫁妆，就反对你嘅婚事，更加系荒唐到极点。呢种咁欺贫重富嘅行为，边处似同仔娶新抱，直情当个仔系条件、货物一样，等人地出高价嚟买佢个仔……

　　（张怒关收音机愤愤地猛吃萝卜糕。）

　　佩：爸爸，我谂起啦，呢个女人声好似……（突然心虚止住）

　　张：（劈掌）系佢啦！唔怪得越听越似响处闹我，一定系佢！

　　张太：边个呀？

　　张：就系嗰个外江女李曼玲呀，咁你都听唔出佢把声？

　　张太：系噃，阿清话佢系响电台度播音嘅。

　　张：唔怪得知我一见佢面就话点解咁面熟呢，原来系佢把声好熟……（对张太太）你睇吓你中意嘅嗰个宝贝新抱呀，居然公开响电台度闹我，仲成世界嘅，等阿清番嚟，我要问吓佢至得……（突然）嗳哟，嗳哟！（置箸捧心叫痛）

　　张太：做乜嘢？又是胃痛呀？

　　张：胃乜嘢痛呀，俾个衰女激到我心痛就真！

　　（张太太忙扶张躺下。）

　　佩：使唔使叫医生嚟同爸爸睇吓？

　　张太：咁夜去边度揾医生出诊呀？

　　佩：我介绍个医生俾爸爸喇，佢一定肯嚟嘅。

　　张太：咁快啲去喇。

　　（佩打电话。）

　　Diss.

　　（半小时后，张盖毡卧沙发，张太太旁坐。佩导焕入。）

　　佩：爸爸，呢位系李医生。

　　张：（坐起）乜又系呢个黄绿医生呀，唔使佢睇咯，快啲叫佢扯。

　　佩：爸爸，李医生特登赶嚟同你睇病，做乜你咁冇礼貌啫！

　　张：你明知我唔中意啲外江佬医生，仲叫佢嚟做乜？

　　张太：咁夜揾唔到广东医生啦嘛！

　　张：佢话叫我唔好食萝卜糕，食多咗会中风，我食咗咁多年伤风都未试过，你话呢啲医生信唔信得过呀？（向焕）扯！

　　（焕笑笑提皮包向外走。）

　　张太：（向焕抱歉地）真系对唔住，上一次啲出诊费同呢次计埋一齐啦！

　　唤：不不，不用了。

　　张：你叫我唔好食萝卜糕，我偏偏食多啲俾你睇。（吃糕）

　　佩：（用国语）今天真是对不起，爸爸就是这样，对外省人有偏见。

　　焕：我知道，我知道。（出）

　　（佩送出。）

　　F.O.

　　第二十八场

　　景：张家

　　时：日

　　人：清、佩

　　F.I.

　　（清来至门口，见佩穿着整齐由卧室出。）

　　清：出街呀？

　　佩：唔！去睇医生。

　　清：呢两日辛苦你啦，累你要去睇医生。

　　佩：你知道就好啦！

　　清：第日我请你饮茶。

　　佩：（点头）唔好唔记得。

　　（二人出门。）

　　D.O.

太玄书阁(xuge.org)